[1]
چیکه چیکه
ــــــــــــــــــــــــــــــــــــــــــــــــــــــــــــــــــــ
بوش چیکه چیکه ماری که، کوچیل ژیر داواری که
نازک و نرمه چوی پمی، سیخ چولی نازاری که
هم ساکت و هم دنگ هتی، أژ پت فیل اِرا کتی
ناقابله چوی گلمتی، سالمِ دردَ باری که
چوی آو سر کنی حنِک، چوی ولگ گل نرم و تُنِک
ژر دار و تیژه چوی دِرِّک، هم لیژ و هم بناری که
آ نموسی چوی زر زره، اِی گوش کم و اِی زون فره
تمومی حلق و حنجره، وراجِ بی قراری که
چوی مونگِ چوارده کامله، تموم عمری باطله
چوی یاخی نوم قافله ، تیر آیجِ وژ آشاری که
هم خیر و هم شرِّ تموم، نیمی عسل نیمی ژقوم
بی توم تر اَژ پیاز خوم، رنگین تر اژ اناری که
نمناک، چوی خاک کنَه لون، حشکی و راقی چوی سخون
صافی چوی تویلِ خیزرون، بچ بچِ ناهماری که
چوی دارِ شاینک پر ثمر، شیرین چوی زیمِ قی کمر
نیشی چوی کولاژدُم خطر، هَفیِ پا مَخاری که
اِسبی چوی قن، سی چوی زخال، خط خط و نق نق چوی غزال
تموم جمالِ بی کمال، زمسونِ بی وهاری که
مگر خدا بکی فرج، کس أژ دسی نیری حَرَج
تریکه شو و بی دِرَج، شومونگِ وَر نِساری که
“کرم” یه چیکه تن خدا، بلاجوی، پر ماجرا
صد آفرین هر کی وِتا، آیم سَرِشته داری که
ترجمه ی کلمات دشوار:
کوچیل : سرستون خیمه/ گلمتی: کلوخ/ ژقوم: بسیار تلخ/ کنه لون: محل قراردادن مشک/ تویل: شاخه ی نورسته/ بِچ بِچ: گره گره (چوب)/ شاینک: بوته ای دارویی که دانه ی آن شاه دانه و خود بوته شابیزک نام دارد/ زیم: کندوی عسل/ هفی: افعی/ درج: فرج ، رهایی/ بلاجوی: عجیب و غریب
کرم دوستی