- پایگاه خبری، تحلیلی میرملاس - https://www.mirmalas.com -

شعر لکی “سازبژن”

حشمت-اله-آزادبخت-2

 

حشمت اله آزادبخت / میرملاس : 

سازبژن

***

ساز دلم بوو وه خریوی بژن
چِنگ بیه ر ئی سینه، بتن ، خوین بتن
ئی دله بیمار هزار سالیه
ئی دله چالی که پرِّ نالیه
ئی دله زخمی، دله کوشیا، کتی
هرچه نهات گنه ئر سر هتی
پاپتی آیلل خنه کوشیا دی کوشت
چه م  آشاریا  دت هومسا دی کوشت
شعر اِ بَنِ دسل ژار ئیر نمای
کاری اِ دس برز هاوار ئیر نمای
حال ئی ملکه مری آزا نماو
پنجره کویچل تنگه آنماو
سویلی ئرا زَم زمین تر نیه
جاشقه شق بال کموترنیه
سازنه بوو ساز گرونی بژن
سفری ام پِرّ چمدونی بژن
پر چمدنی که پر اِ ناله بوو
پِرّ دسل گورج دودسماله بوو
ساز بژن ساز بژن سازنه
گیون بیه دسمال دس ِ بازنه
ساز بژن ساز بژن تینی ام
کوک دلم بار که نفرینی ام
بیت بخون بیت بخون بیت خوو
لام بی اِ فال گن چلسروو
چنی که شیویامه بوسم یا بچم ؟!
بار دلل ها سر هوشکی لچم
بوری بژن ساز سفر مِ بچم
اِ ئی چله سخته دیرم مرّچم
سازی بژن عین هنا عینعلی
بیتی بخون چوی دنگ مومنعلی
دادم ئرّا کلکل ایمومقلی
آخم ئرا هناسی شگرلی
بیتی ئرا کوت کوت دسمال له
شور بیه حال کتی بال له
بیتی که دومون گومم گِل بیا
بوری خم و خوصه دل ئو آنیا
سازنه پِف که آگرم کور که
صور بِدم ساز سفر جور که
سازی زمین برشنی اِ آسمو
دول بکوو دول ئه رّمه یِ وِچو
دول بکوو توز اِ زمین هیزگری
قیژه کلل  داخ دلل برشنی
بیتی اِ ته ر دنگ ایرج بخوه ن
تنگه دلم سازنه رارا بژن

*******

پی نوشت:

مومنعلی: شادروان استاد مومه جوزی پور
عینعلی: استاد عینعلی تیموری هوره چِرّ بی نظیر کوهدشتی
ایمومقلی: مرحوم استاد امامقلی عزیزی تنبورنواز مشهور کوهدشتی
شگرلی: مرحوم استاد شگرعلی رضایی، سرنانواز کوهدشتی
ایرج: استاد ایرج رحمان پور